கலைஞருக்கு ஹெல்ப் பண்ணுவோம் வாங்க!

நம்ம சரக்கு வேற முடியப் போகுது என்ன ஒரு பயலையும் காணோம், ம்ம்ம்... ஆஹா ஒரு அல்லக்கை (அல்லக்கை ரூல்ஸ் படி அவங்க பேர சொல்றதில்ல) நம்மல பாத்து வந்துட்டிருக்கே, படுவா இங்க எதுக்கு வர்ரான், இன்னைக்கு என்ன வில்லங்கத்துல மாட்டி விடப் போறானோ?

வாடா மண்டையா! என்னடா இந்நேரத்துல இந்தப் பக்கமா வந்திருக்க?

அல்லக்கை: உங்களப் பாக்கத்தாண்ணே வந்தேன்

பன்னிக்குட்டி ராம்சாமி: என்னப் பாக்கவா? நீ சும்மா வரமாட்டியே, என்னன்னு சொல்லு?

அல்லக்கை: அண்ணே, மதுரைல வழக்கறிஞர்கள்லாம் ஏதோ உண்ணாவிரதம் இருக்காங்களாமே?

ப.ரா.: அது ஏதோ உண்ணாவிரதமில்லைடா தடியா, ஹைகோர்ட்டுல தமிழ்லதான் வாதாடனும்னு அவங்க போறாடுராங்க

அல்லக்கை: எங்க டெல்லி ஹைகோர்ட்டுலயா அண்ணே?

ப.ரா.: டேய் தீவட்டி, நம்ம சென்னை, மதுரை ஹைகோர்ட்டுலைடா

அல்லக்கை: ஏண்ணே இந்த கோர்ட்டுகள் தமிழ்நாட்டுலதானே இருக்கு, இவ்வளவுநாளும் தமிழ்ல வாதாடலையா? அப்போ படத்துல எல்லாம் தமிழ்ழதாண்ணே வாதாடுராங்க?

ப.ரா.: பாருங்க சார், கருவாட்டு மண்டையன் சினிமா பாத்து பாத்து எப்படி டெவலப் ஆயிருக்கான்னு, உன்ன மாதிரி நாட்டுல 6 கோடி பேரு இருக்காங்க என்ன செய்யறது? எல்லாரும் சினிமா பாத்துட்டு வீட்டுக்கு போனா உடனே குப்புறப் படுத்துக்காதீங்க, புத்தகங்கள் படிங்க, செய்திகள் பாருங்க, படிங்க, அப்படியே டெவலப் ஆகுங்க

அல்லக்கை: புல்லரிக்குதுண்ணே, நல்ல கருத்தா சொல்றீங்கண்ணே!

ப.ரா.: ங்கொக்கா மக்கா குசும்ப பாரு, கொள்ளிக்கட்டைய எடுத்து அப்படியே தேச்சு விட்ருவேன்!

அல்லக்கை: அதெல்லாம் சரிண்ணே, லாயர்கள்லாம் உண்ணாவிரதம் இருக்காங்களே அதுக்கு என்ன செய்யபோறீங்க?

ப.ரா.: எங்க வந்து என்ன கேள்வி கேட்குது பாரு? ஏண்டா மண்டையா, செய்யவேண்டியவனுங்க எல்லாரும் செம்மொழி மாநாடுலயும், அடுத்து என்ன பாராட்டு விழான்னும் பிசியா இருக்காங்க, எங்க கொண்டு போயி என்னைக் கோர்த்து விடற பாத்தியா?

அல்லக்கை: அதுக்கில்லண்ணே, ஏதோ நம்மால முடிஞ்சது ஏதாவது செய்யலாம்ணே!

ப.ரா.: அது மட்டும் நட்க்காது மவனே, எதையாவது பண்ணி என்னைச் சிக்கல்ல மாட்ட வெக்கனும் அதானே உன் ப்ளான், படுவா!

அல்லக்கை:இல்லண்ணே, தலைவரு வழக்கமா டெல்லிக்கு கடிதம் எழுதுவாரே, அத இப்போ ஏன் இன்னும் எழுதல? யோசிச்சீங்களா?

ப.ரா.: கடிதம் எழுதறது அவரு இஷ்டம், அதப்ப்பத்தி நமக்கென்ன? சரி யோசிச்சு நீயே சொல்லு!

அல்லக்கை: தலைவரு செம்மொழி மாநாட்டு வேலைலயும், பாராட்டு விழாக்கள்லயும் ரொம்ப பிசியா இருக்காருண்ணே, அதான் இந்தத் தடவ கடிதம் எழுத முடியல போல,

ப.ரா.: கரண்டி வாயனுக்கு எப்படியெல்லாம் யோசனை போகுது பாரு, ம்ம்ம்.. அதுக்கு என்ன பண்ரது சொல்லு?

அல்லக்கை: தலிவரு எழுதுவது மாதிரியே நீங்க ஒரு கடிதம் எழுதுங்கண்ணே, அதை கொண்டு போயி தலைவருகிட்டே கொடுத்தோம்னா, சந்தோசப்படுவாரு, நமக்கும் ஏதாவது கெடைக்கும்!

ப.ரா.: (ம்ம்ம்.. நல்ல ஐடியாவாத்தான் இருக்கு, இவன் பேச்ச நம்பி இறங்கலாமா?) டேய் பேரிக்கா மண்டையா, வாழ்க்கையில மொத மொதலா ஒரு நல்ல யோசனை சொல்லியிருக்க, உன் பேச்சை நம்பி எழுதுறேன், ஏதாவது வில்லங்கம் வந்துச்சி, மவனே நீ சட்னிதாண்டி!

ஓக்கே ஸ்டார்ட்!

அனுப்புனர்:
மாண்புமிகு டாக்டர் தமிழனத்தலைவர் கலைஞர்
முதலைமைச்சர்
தலைமைச்செயலகம் (புதியது)
சென்னை,
தமிழ்நாடு

பெறுநர்:
மாண்புமிகு டாக்டர் மன்மோகன்சிங்
பிரதமர்,
டெல்லி

பொருள்: தமிழக உயர்நீதிமன்றங்களில் தமிழில் வாதாடுவது சம்பந்தமாக

பெருமதிப்பிற்குரிய அய்யா,
தமிழ்நாட்டில் சில வழக்குறைஞர்கள் சில நாட்களாக உண்ணாவிரதம் இருந்து வருவது குறித்து உளவுத்துறை மூலமாக தாங்கள் அறிந்து இருப்பீர்கள். அதைத் தங்களின் கவனத்திற்கு கொண்டுவர விரும்புகிறேன். இதுவரை நான் எழுதிய எந்தக் கடித்ததிற்குமே நீங்கள் நடவடிக்கை எடுக்கவில்லை. இதற்கும் எதுவும் இருக்காது என்ற நம்பிக்கையில்தான் இக்கடிதத்தை எழுதுகிறேன். நீங்கள் ஏதாவது ஒரு பத்திரிகையாளர் சந்திப்பில் என்னிடம் இருந்து கடிதம் வந்திருக்கிறது என்று ஒப்புக் கொண்டால் போதும், நான் இங்கே உள்ளவர்களை சமாளித்துக் கொள்வேன்.
மேலும் தமிழ் செம்மொழி மாநாடு நடக்க இருக்கும் நேரத்தில் இவ்வாறு இருப்பது கவலை அளிப்பதாக உள்ளது. எனவே கடித்ததிற்கு பிறகும் அவர்கள் உண்ணாவிரதத்தை நிறுத்தாவிட்டால் நான் தந்தி அடிக்க வேண்டியிருக்கும் என தெரியப்படுத்தி கொள்கிறேன்.

நன்றி.

இப்படிக்கு
மு.க

பி.கு: எனது மகளுக்கு கேபினட் அமைச்ச்ர் பதவி கொடுப்பது சம்பந்தமாக நான் உங்களைச் சந்திருக்க அடுத்த வாரம் டெல்லி வருகிறேன். மத்திய அமைச்சர் அழகிரி மதுரையிலிருந்தவாறே பணிகளைக்கவனிக்கவும், பாராளுமன்றத்திற்கு பதில் அளிக்கவேண்டிய அவசியம் இல்லை என்றும் தனி அரசாணை வெளியிடுவதாக என்னிடம் வாக்கு அளித்திருந்தீர்கள். அது ஏன் தாமதம் ஆகின்றது? அதுபற்றியும் அப்போது விரிவாகப் பேசுவோம்.இலங்கைத்தமிழர் குடியேற்றம் தொடர்பாக நீங்கள் எழுதிய கடிதம் கிடைத்தது. இனிமேல் நீங்கள் இதுபோல் கடிதங்கள் அனுப்பிக் கொண்டிருந்தால் அது நல்லதல்ல. மறுபடியும் எனக்கு நீங்கள் கடிதம் எழுதினால் அன்னையிடம் இதுசம்பந்தாமாக புகார் செய்வேன், எச்சரிக்கை! நன்றி!

எப்பூடி, தலைவருக்கே கடிதம் எழுத ஹெல்ப் பண்ணீட்டம்ல? ஒருவழியா தமிழினத்தலைவருக்குத் தேவையான கடிதம் தயார், இனி அவர் டெல்லிக்கு அனுப்பவேண்டியதுதான் பாக்கி!

மேற்கண்ட கடிதத்திற்கு ஸ்டாம்ப் ஒட்ட பணம் தேவைப்படுவதால் கீழ்கண்ட அக்கவுண்ட்டிற்கு தங்களால் இயன்ற அளவு பணம் அனுப்பவும். தமிழுக்குத் தொண்டு செய்த பெரும்புகழும் பாக்கியமும் உங்களுக்கும் கிடைக்கும்.

A/c: 345621987