இருட்டில் வந்த அந்த உருவம்....!

உறங்கிக்கொண்டிருந்த கணேஷ் திடுக்கிட்டு விழித்தான். ஏதோ கெட்டவாடை ஒன்று அடிப்பதை உணர்ந்தான். நிமிர்ந்து பார்த்தால் ஏதோ நின்று கொண்டிருந்தது. பதறி எழுந்து விளக்கை போடலாம் என்றால் அது படுக்கும் படி சைகை செய்தது. அமைதியாகப்படுத்தான். அது நெருங்கி வந்து முகத்தில் கையை வைத்து வருடியது. அதன் கையில் இருந்து வந்த வாடை கணேசுக்கு என்னமோ செய்தது. மயக்கம் வருவது போல் உணர்ந்தான். அந்த உருவம் சற்று நிறுத்தி பின் மறுபடி வருட ஆரம்பித்தது. 

கணேஷ் இப்போது அரைமயக்க நிலையில் இருந்தான். மெல்ல நினைவு வருவது போலும் இருந்தது. யார் நீ, என்ன செய்கிறாய் என்று கேட்க நினைத்தான் வாயை அசைக்க முடியவில்லை. அதற்குள் அந்த உருவம் பயப்படாதே, நாங்கள் உன்னை ஒன்றும் செய்ய மாட்டோம் சற்று பொறுத்துக்கொள் என்று அவன் மனதில் பதிய வைத்தது. நிம்மதிப் பெருமூச்சு விட்ட படி குனிந்து பார்த்த கணேஷ் திடுக்கிட்டான். அதற்குள் அவனும் அது போலவே மாறி இருந்தான்.

இனி வேறு வழியில்லை, எழுந்து வெளிய ஓடிவிடலாம் என்று முடிவு செய்து எழ முயன்றான், ஆனால் அதற்குள் சுதாரித்துக் கொண்ட அந்த உருவம் அசையவே முடியாத அளவுக்கு அவனை உறையவைத்துவிட்டது.. ஆற்றாமையோடு எரிச்சலும் சேர்ந்து கொள்ள கோபமாய் அந்த உருவத்தைப் பார்த்தான். அது எக்காளமிட்டு சிரித்தது. கணேஷிற்கு கண்களில் மளுக்கென்று நீர் கோர்த்துக் கொண்டது. 

அந்த உருவம் மறுபடியும் அவன் அருகில் வந்து அவன் முகத்தில் கைவைத்துத் தடவியது. அதே கெட்ட வாடை. நெஞ்சில் ஏதோ கரிப்பது போல் இருந்தது. ஏப்பம் வேறு வந்தது போல் உணர்ந்தான். அதில் ஏதோ புளித்த வாடை, மெல்ல இருமினான். அந்த உருவம் இப்பொது அவன் முகத்தில் இருந்து இறங்கி வயிற்றில் கைவைத்து அழுத்தத் தொடங்கியது. நெஞ்சுக்குள் என்னமோ பந்தாய் மேலே உருண்டு வந்தது. 

பயந்து போய் அந்த உருவத்தை பரிதாபமாக பார்த்தான் கணேஷ். அதைப் புரிந்து கொண்ட அந்த உருவம் குடல்வழியாக உனது ஆத்மாவை வெளியே எடுக்க போகிறேன் என்று அவன் மனதில் பதிய வைத்தது. என்ன ஏது என்று அவன் சுதாரிப்பதற்குள் பொலக் என்று வெளிய வந்து விழுந்தது அவன் குடல், மறுபடியும் ஓங்கரித்தான்.... 

டேய்ய் என்று கதறீயபடி முதுகில் ஓங்கி அறைந்தது அந்த உருவம்.கணேஷ் திடுக்கிட்டு விழித்துக் கொண்டான். பார்த்தால், அருகில் தலையை பிடித்தபடி ரூம் மேட் ரமேஷ் நின்று கொண்டிருந்தான். ஏன்டா எழவெடுத்தவனே, இன்னிக்கும் தண்ணியடிச்சிட்டு வ்ந்து பெட்ல வாமிட் பண்ணிட்டியாடா நாதாரி...? எத்தனை தடவடா எழுப்புறது?

இது டெரர் பாண்டியன் அவர்களின் பதிவிற்கு (கலி முத்தி போச்சி..) எதிர் கவிதை.. ச்சே.. எதிர் கதை என்று மிகவும் வருத்ததுடன் தெரிவித்துக் கொள்கிறேன்...! (இக்கதை ஏற்கனவே என் பஸ்சில் வெளியிடப்பட்டது)

படத்திற்கு நன்றி கூகிள் இமேஜஸ்!

!